Қазақстанның қай өңірінде көлік көп

pixabay.com

Қазақстандағы автокөлік саны алты миллионға жақындап қалды, деп хабарлайды Ulysmedia.kz.

Ұлттық статистика бюросының мәліметіне сәйкес, 1 желтоқсандағы жағдай бойынша ел аумағында 5 млн 843,3 мың автокөлік тіркелген. Оның басым бөлігі — В санатындағы жеңіл көліктер (шамамен 4,9 млн).

Ең көп автокөлік Алматы қаласында тіркелген — 718 мың. Ресми дерекке сай, оңтүстік мегаполистің халқы 2 млн 337 мың адамды құрайды. Яғни шамамен әрбір үш алматылыққа бір автокөліктен келеді. Әрине, бұл көліктердің қала тұрғындары арасында теңдей бөлінгенін білдірмейді.

Келесі орындарда Алматы облысы (636,7 мың көлік) мен Түркістан облысы (495,8 мың) тұр. Одан кейін Астана (443,5 мың) және Қарағанды облысы (376,7 мың) келеді. Ал ең аз автокөлік жаңа құрылған екі өңірде тіркелген: Абай облысында — 92,8 мың, Ұлытау облысында — 33,4 мың.

Қала аумағындағы автокөлік санының шамадан тыс көптігіне байланысты Алматы билігі мегаполиске ақылы кіру тәртібін енгізу мәселесін көптен бері көтеріп келеді. Алайда бұл бастама Экологиялық кодекске қайшы келуі мүмкін.