Қытай туу көрсеткішін арттыру үшін босануды тегін етуге көшпек
Қытай билігі 2026 жылға дейін ел көлемінде босануға байланысты медициналық қызметтерді толықтай тегін ету жоспарын жариялады, деп хабарлайды inbusiness.kz сайты Синьхуа агенттігіне сілтеме жасап.
Фото: canva.comЖаңа бастама ұлттық медициналық сақтандыру жүйесі аясында іске асырылады және ата-аналарға түсетін қаржылық салмақты жеңілдетуге бағытталған. Тиісті жоспар денсаулық сақтау саласындағы ұлттық қауіпсіздік мәселелері талқыланған конференцияда таныстырылды.
Биліктің мәліметінше, бұл шара елдегі бала туу деңгейінің төмендеуіне жауап ретінде қабылданып отыр. Осыған байланысты жүктілік кезеңіндегі медициналық тексерулер мен босануға кететін шығындарды сақтандыру есебінен өтеу көлемін ұлғайту көзделген.
Жоспарға сәйкес, алдағы жылдары босануға байланысты негізгі медициналық қызметтер сақтандыру бағдарламалары арқылы толық жабылады. Яғни стандартты акушерлік көмек үшін азаматтар жеке қаражатынан төлем жасамайды.
Қазірдің өзінде Қытайдың кемінде жеті аймағында, соның ішінде Цзилинь, Цзянсу және Шаньдун провинцияларында, стационарлық босану шығындары толық өтеліп келеді. Алайда бұл тек сақтандыру тізіміне кіретін базалық қызметтерге қатысты. Ал жоғары санаттағы клиникаларды таңдау немесе қосымша дәрі-дәрмектер қолдану жеке төлемді талап етеді.
Сонымен бірге Қытайдың Медициналық қамтамасыз ету жөніндегі мемлекеттік басқармасы икемді жұмыспен қамтылғандар, еңбек мигранттары және жаңа форматта жұмыс істейтін азаматтар үшін жүктілік пен босануға арналған сақтандыруды кеңейту мәселесін пысықтап жатыр. Бұл қадамдар да демографиялық өсімді қолдауға бағытталған.
Қазіргі уақытта елде жүктілік пен босануға байланысты медициналық сақтандырумен шамамен 255 миллион адам қамтылған.
