Мемлекеттік рәміздер – ұлттық бірегейліктің нышандары

Фото: ашық дереккөзден алынды

Ту

Қазақстан Республикасының Мемлекеттік Туы – көгілдір түсті тікбұрышты мата. Оның ортасында алтын түсті күн бейнесі орналасқан, күннің астында қалықтаған қыран құс бар. Тудың сол жағында ұлттық ою-өрнек – «қошқар мүйіз» өрнегі тігінен бейнеленген.

Көгілдір түс – бейбітшілік пен ашық аспанның, бірлік пен тазалықтың белгісі. Ал күн – өмір мен энергияның нышаны. Қыран құс – еркіндікке, биік мақсатқа және тәуелсіздікке ұмтылуды білдіреді. Ұлттық өрнек халқымыздың бай мәдени мұрасын көрсетеді.

Елтаңба

Қазақстан Республикасының Елтаңбасы – шеңбер пішініндегі рәміз. Оның ортасында киіз үйдің шаңырағы бейнеленген, ал екі жағында қанатты тұлпарлар орналасқан. Жоғарғы бөлігінде бес бұрышты жұлдыз, төменгі жағында «QAZAQSTAN» жазуы бар.

Шаңырақ – ортақ үй, ортақ тағдыр символы. Ол еліміздегі барлық этностардың бірлігін білдіреді. Қанатты тұлпар – мифологиялық бейне, ол елдің рухани байлығын, батырлығын, болашаққа ұмтылған жоғарғы мақсатын айқындайды. Жұлдыз – биік мұрат пен ашық болашақтың белгісі.

Гимн

Мемлекеттік Гимн – ел азаматтарының Отан алдындағы патриоттық сезімін айшықтайтын әнұран. Қазіргі Гимннің сөзі – Жұмекен Нәжімеденов пен Нұрсұлтан Назарбаевқа, ал музыкасы Шәмші Қалдаяқовқа тиесілі. Гимн тәуелсіз Қазақстанның рухын, елдік мұратын, халықтың ынта-жігерін бейнелейді.

Мемлекеттік рәміздер – Ту, Елтаңба, Гимн – Қазақстанның басты құндылықтарының бірі. Олар біздің тарихымызды, мәдениетімізді, тәуелсіздігімізді және ұлттық болмысымызды әлемге танытады. Әрбір азамат үшін мемлекеттік рәміздерге құрмет – Отанға деген сүйіспеншіліктің көрінісі.

Қазалы аудандық соты

әкімшісінің жетекші маманы