Қазақстанда өзгенің брендімен табыс тапқандарға түрме жазасы қарастырылмақ
Бұл шаралар елде бренд ұрлығына тосқауыл қоюға және әділ бәсекені қорғауға бағытталған.
Фото: freepik.com
Фото: freepik.comҚазақстан Әділет министрлігі зияткерлік меншік саласындағы жауапкершілікті күшейтуге кірісті, деп хабарлайды Skifnews.kz ақпарат порталы.
Енді танымал бренд атауын немесе тауар белгісін рұқсатсыз пайдалану жай ғана әкімшілік құқық бұзушылық емес, қылмыстық жауапкершілікке әкелуі мүмкін. Министрлік ұсынған түзетулерге сәйкес: Тауар белгісін заңсыз қолданғандарға салынатын айыппұл көлемі 314 мыңнан 786 мың теңгеге дейін ұлғаяды; Құқық бұзушыға үш жылға дейін бас бостандығын шектеу немесе айыру жазасы тағайындалуы ықтимал; Брендтік даулар бойынша сараптама мерзімі 10 жұмыс күніне дейін қысқарады, бұл кәсіпкерлердің уақытын үнемдеуге мүмкіндік береді.
Әділет министрлігінің мәліметінше, бұл шаралар елде бренд ұрлығына тосқауыл қоюға және әділ бәсекені қорғауға бағытталған. Ведомство өкілдері атап өткендей, егер заң бұзушылық жүйелі сипат алып, бизнеске ірі залал келтірсе, жаза барынша қатаң болады. Сарапшылар бұл бастаманы нарықты “жалған брендтерден” тазартуға және кәсіпкерлердің зияткерлік меншікке деген жауапкершілігін арттыруға жасалған маңызды қадам деп бағалап отыр.
