"Менің елім - менің туым" акциясы бастау алды
Биыл Қазақстанның мемлекеттік егемендігі туралы Декларация қабылданғанына 35 жыл толады. Мемлекет басшысы Қасым-Жомарт Тоқаев атап өткендей, Республика күні халқымызды мызғымас құндылықтар төңірегіне тоғыстырып, жалпыұлттық бірегейлігімізді нығайта түсуге ықпал етеді.
Осы ретте «AMANAT» партиясының 25 қазан – Республика күні қарсаңында ұйымдастырған «Менің Елім – Менің Туым» акциясы Отанға деген сүйіспеншілік пен ел бірлігінің жалпыұлттық нышанына айналды. Төртінші жыл қатарынан ұйымдастырылып келе жатқан бастамаға Қызылорда қаласының «Жастар Рухы» Жастар қанаты белсенділері, еріктілері мен қала тұрғындары атсалысуда.
Жыл сайын қаламыздағы ғимараттартарға Ту ілетін жастар биылғы жылы Сол жағалауға өтетін аспалы көпірдің көркін келтірді.
Айта кетейік, Республика күні қарсаңындағы акцияға екі мыңнан астам жас атсалысып, еліміздің түкпір-түкпірінде 10000-нан астам мемлекеттік ту желбіреуде.
