Жапонияда гаджеттерді пайдалану уақытын шектеу туралы ереже қабылданды
Фото: ©pixabay.com
Жапонияның Тоёакэ қаласында тұрғындардың цифрлық құрылғыларды пайдалану уақытын шектейтін жаңа ереже енгізілді, деп хабарлайды El.kz интернет порталы.
Енді смартфон, планшет, ойын приставкасы мен компьютерді (жұмыс пен оқу мақсатынан басқа) күніне екі сағаттан артық қолдануға болмайды.
The New York Times мәліметінше, бұл бастама – елде алғаш рет қолға алынған мемлекеттік деңгейдегі жоба. Оның мақсаты – азаматтарды интернетке тәуелділіктен арылтып, шынайы өмірге көбірек көңіл бөлуге ынталандыру. Тоёакэ қаласында шамамен 68 мың адам тұрады. Жаңа шешімді қалалық мәслихат көпшілік дауыспен (12 – «жақтап», 7 – «қарсы») қабылдаған. Қаулы 1 қазаннан бастап күшіне енді.
Алайда бұл ереже міндетті емес, тек ұсыныстық сипатта. Яғни, белгіленген уақыттан асып кеткені үшін ешкімге айыппұл салынбайды және бақылау жүргізілмейді. Дегенмен жапон қоғамында мұндай бастамаларға салмақты қарау қалыптасқан, ал қоғамдық пікір азаматтарға қатты әсер етеді. Билік өкілдері тұрғындар телефонды жиі қолына алмай, туыстарымен, жақындарымен көбірек уақыт өткізеді деген үміт білдіріп отыр.
Соған қарамастан, бұл шешім қоғамда қызу пікірталас тудырды. Қала әкімдігіне шамамен 400 шағым түскен, ал әлеуметтік желілерде бұл ережені жоюды талап еткен петиция пайда болды.
Айта кетейік, Жапонияда гаджеттерге тәуелділік мәселесі бұған дейін де бірнеше рет көтерілген. 2024 жылғы зерттеулерге сәйкес, мектеп оқушылары телефонды күніне орта есеппен бес сағаттан артық қолданады. Сарапшылардың пікірінше, Тоёакэ билігінің бастамасы цифрлық технологияларды шамадан тыс пайдалану қаупі туралы қоғамның хабардар екенін арттыруға сеп болады.
