Самокат тепкендерге тротуармен жүруге тыйым салу ұсынылды

Ішкі істер министрінің орынбасары Игорь Лепеха былтыр электросамокаттарды пайдалануға бақылауды қатаңдату туралы тиісті ұсыныстар берілгенін, бірақ олардың бірқатары қолдау таппағанын айтты.

Депутаттар қарап жатқан "Қазақстан Республикасының кейбір заңнамалық актілеріне көліктің жаңа түрлерінің қозғалысын реттеу және жол жүрісінің қауіпсіздігін қамтамасыз ету мәселелері бойынша өзгерістер мен толықтырулар енгізу туралы" заң жобасы шеңберінде электросамокаттардың тротуармен жүруіне тыйым салу, кикшеринг қызметіне міндеттеме жүктеу қарастырылған, ал әкімдіктерге оларды пайдалану ережелерін қабылдау құқығын беру ұсынылып отыр.

Ал премьер-министр Олжас Бектенов мопедтер мен самокаттарды пайдалану барысына бақылауды күшейту қажет екенін айтты.

"Жолдауда мемлекет басшысының осы өзекті мәселеге назар аударуы кездейсоқ емес.

Әлемдік тәжірибе бірқатар елде мұндай көлік құралдарынан толық бас тарту немесе оған шектеу қою шаралары қолданылғанын көрсетіп отыр.

Мәселен Парижде 2023 жылдың қыркүйек айынан бастап самокаттарды жалға алуға тыйым салынды. Тек өз құралыңды пайдалануға рұқсат. Өткен жылдың қазан айынан бастап Мадридте де дәл осындай шектеу шаралары күшіне енді. Ұлыбританияда әрбір электросамокатқа мемлекеттік нөмір беріліп, оны тек жүргізуші куәлігімен ғана басқаруға болады.

Ішкі істер министрлігіне заңнамаға тиісті түзетулер енгізуді жылдамдатуды тапсырамын", - деді Олжас Бектенов.