Мал шаруашылығына көрсетілетін мемлекеттік қолдауға мониторинг жүргізілді
Бүгін «AMANAT» партиясы Қазалы аудандық филиалы жанындағы Партиялық бақылау комиссиясы мал шаруашылығын қолдау бағытындағы мемлекеттік бағдарламалардың орындалуына мониторинг жүргізді.Іс-шараға Партиялық бақылау комиссиясының мүшесі, аудандық мәслихат депутаты Күншығар Әбілов, партия филиалының сарапшысы Алтынай Кенжалиева, аудандық ауыл шаруашылығы және жер қатынастары бөлімінің сектор меңгерушісі Мұратбай Бекмағамбет, сондай-ақ басқа да сала мамандары қатысты.
Партия өкілдері «РЗА» АҚ-ның өндірістік алаңына барып, асыл тұқымды мал шаруашылығы, ет және сүт өнімдерін өндіру, ауыл шаруашылығы дақылдарын өсіру бағытындағы жұмыстармен танысты. Кәсіпорын мамандары мал басын көбейту, асылдандыру және өнімділікті арттыру жөнінде ақпарат берді.
Айта кетейік, партияның Сайлауалды бағдарламасын іске асырудың өңірлік Жол картасында мал басын көбейту, оны асылдандыру және өнімін ұлғайтуға бағытталған мемлекеттік қолдау шараларының орындалуын бақылау көзделген. Осы бағытта партия филиалы тарапынан тұрақты түрде мониторинг жүргізіліп келеді.
