Тоқаевтың тапсырмасы: Қазақстанда жаңа штаб құрылды
Фото: Ақорда баспасөз қызметіҚазақстанда Президенттің тапсырмасымен шенеуніктер мен күштік құрылым өкілдерінен құралған жаңа штаб құрылды, - деп хабарлайды Tengrinews.kz.
Бұл шешім Қасым-Жомарт Тоқаевтың Қауіпсіздік кеңесінің отырысында айтқан тапсырмаларын орындау мақсатында қабылданған. Штабты елдің Премьер-министрі басқарады, ал оның орынбасарлары болып Премьер-министрдің орынбасары мен Ішкі істер министрі тағайындалды.
Негізгі міндеті
Штабтың негізгі міндеті ретінде мемлекеттік органдардың нашақорлыққа және есірткі бизнесіне қарсы тұру жөніндегі іс-қимылын үйлестіру, алдын алу шараларын жүзеге асыру бойынша тиімді тәсілдер әзірлеу, есірткіге тәуелді адамдардың профилактикасын, емін және оңалту жүйесін жетілдіру жұмыстары айқындалды.
Құрамы
Штаб құрамына Бас прокуратураның, Ұлттық қауіпсіздік комитетінің, Қаржы мониторингі агенттігінің, Ұлттық банктің, Қаржы нарығын реттеу және дамыту агенттігінің өкілдері, сондай-ақ, бірқатар жауапты министрлік басшылары енді.Премьер-министрдің өкімімен облыстарда, Астана, Алматы және Шымкент қалаларында өңірлік штабтар құру көзделген.
