Қазақстанда кім және қаншалықты жиі скринингтен өтуге тиіс: Нұсқаулық

Фото: pixabay.com

40, 42, 44, 46, 48, 50, 52, 54, 56, 58, 60, 62, 64, 66, 68, 70, 72, 74 және 76 жасқа толған ерлер мен әйелдер артериялық гипертония, жүректің ишемиялық ауруы, қант диабеті, глаукома және мінез-құлықтық қауіп факторлары бойынша динамикалық бақылауда тұрмаса, екі жылда бір рет скринингтен өтуге міндетті.

Осы жастағы әйелдер сүт безінің қатерлі ісігі бойынша диспансерлік есепте тұрмаса, олар да екі жылда бір рет скринингтік тексеруден өтуі тиіс.

Сонымен қатар, жатыр мойны обыры бойынша есепте тұрмайтын 30, 34, 38, 42, 46, 50, 54, 58, 62, 66, 70 және 74 жастағы әйелдерге әр төрт жыл сайын скринингтен өту ұсынылады.

50 жастан 76 жасқа дейінгі ер адамдар цереброваскулярлық аурулар бойынша диспансерлік есепте тұрмаған жағдайда, олар екі жылда бір рет міндетті түрде тексеруден өтуі қажет.

Сол жастағы ерлер мен әйелдер, егер тоқ ішектің қатерлі және қатерсіз ісіктері бойынша динамикалық бақылауда болмаса, әр екі жыл сайын скринингтен өтуге тиіс.

Декреттелген азаматтар санаты үшін жеке талаптар белгіленген. Оларға В және С вирусты гепатиттерін ерте анықтау үшін алты айда бір реттен жиі емес тексеруден өтуге болады.

Бұл шаралар ауруларды ерте анықтап, алдын алуға бағытталған. Нәтижесінде емдеу тиімділігі артып, сырқаттану деңгейі төмендейді.

Еске салайық, бұған дейін енді МӘМС жүйесінде сақтандырылмаған азаматтар да онкоскринингтен өте алатынын жаздық. Президент Қасым-Жомарт Тоқаев "Денсаулық сақтау, ойын бизнесі және артық заңнамалық регламенттеуді болдырмау мәселелері бойынша кейбір заңнамалық актілерге өзгерістер мен толықтырулар енгізу туралы" Заңға қол қойды. Денсаулық сақтау министрлігінің мәліметінше, қабылданған түзетулер медициналық көмектің қолжетімділігін арттыруға бағытталған. Енді онкологиялық ауруларды ерте анықтау және мүгедектігі жоқ пациенттерді есту аппараттарымен қамтамасыз ету бойынша жаңа шаралар жүзеге асырылады.