Қазақстанда банк картасын басқа адамға бергені үшін қылмыстық жауапкершілік енгізілді
Фото: freepik.comҚазақстанда банк деректемелерін үшінші тұлғаларға бергені үшін қылмыстық жауапкершілік енгізілді. Бұл туралы Stan.kz ақпарат агенттігі хабарлайды.
Ішкі істер министрлігінің ақпараттық медиа-порталында жарияланған мәліметке сүйенсек, Қазақстан Республикасының қылмыстық заңнамасындағы маңызды өзгерістер дербес деректерді қорғауға және қаржы қызметі саласындағы қауіпсіздікті арттыруға бағытталған.
"Қылмыстық кодекстің жаңа 232-1 бабында өзінің банк деректемелерін үшінші тұлғаларға бергені үшін, сондай-ақ материалдық сыйақы немесе мүліктік сипаттағы пайда үшін немесе оларды алу мақсатында үшінші тұлғаның мүддесі үшін я болмаса пайданы көздеп, төлемдер немесе ақша аударымдарын жүзеге асырғаны үшін қылмыстық жауаптылық енгізілді", – делінген ІІМ хабарламасында.
Полицейлердің мәліметінше, алаяқтар берілген деректерді қылмыстық кірістерді қолма-қол ақшаға айналдыру немесе басқа азаматтарды алдау үшін пайдаланады. Көп жағдайда зардап шеккендер өздерінің қылмысқа қатысушы екенін түсінбейді.
"Есіңізде болсын: жеке және банк деректері – жай ғана ақпарат емес, сіздің мүлкіңіздің, қауіпсіздігіңіздің және заң алдындағы жауапкершілігіңіздің кілті", – делінген хабарламада.
ІІМ өкілдері тұрғындарға мынандай кеңес береді:
– ешқашан банк деректеріңізді үшінші тұлғаларға бермеңіз;
– картаңызды немесе шотыңызды беру арқылы "оңай ақша табуға" келіспеңіз;
– күдік туындаған жағдайда, банкке немесе құқық қорғау органдарына хабарласыңыз.
