Ұл балаларды АПВ-ға қарсы вакцинациялау: мерзімі белгілі болды
Фото: depositphotos.comДенсаулық сақтау вице-министрі Тимур Сұлтанғазиев Қазақстанда ұл балаларды адам папиллома вирусына (АПВ) қарсы ерікті вакцинациялау жоспары туралы айтты, - деп хабарлайды Massaget.kz.
Сенат дәлізінде вице-министрден Қазақстанда қыздарға ғана емес, ұлдарға да АПВ-ға қарсы вакцина салу қашан басталатыны сұралды.
"Былтырдан бастап қыздарды АПВ-ға қарсы еге бастадық, бұл - өте қорқынышты диагноз. Болашақта жатыр мойны обыры немесе басқа да онкологиялық ауруларды тудыруы мүмкін. Ұл балаларға қатысты мәселе қарастырылып жатыр. Бүгінде оны Үкімет аясында пысықтап жатырмыз. Алдын ала мәлімет бойынша шамамен бір жылдан кейін бұл жұмысты бастау жоспарланып отыр", - деп жауап берді Тимур Сұлтанғазиев.
Еске салайық, бұған дейін Қазақстанда ұл балаларға да вакцина салу ұсынылды. Бұл туралы Мәжіліс депутаты Асхат Аймағамбетов мәлімдеді.
