Иран ядролық бағдарлама бойынша АҚШ-пен келіссөзге дайын екенін растады

Фото: Dado Ruvic/Reuters
Иран ядролық бағдарламасына қатысты АҚШ-пен келіссөздер жүргізуге дайын екенін мәлімдеді. Бұл туралы Иран Сыртқы істер министрлігінің өкілі Эсмаил Багай CNN арнасына берген сұхбатында айтты, деп хабарлайды BAQ.KZ.

Багайдың айтуынша, Тегеран ядролық бағдарламасының бейбіт мақсатта екенін дәлелдеуге әзір, бірақ уранды байыту мәселесі келіссөздерге жатпайды.

    Егер АҚШ-тың мақсаты – Иранның ядролық бағдарламасы қаруға айналмайтынына кепілдік алу болса, онда бұл біз үшін қиын болмайды, – деді СІМ өкілі.

Ол келіссөздер барысында ымыраға келудің "көп жолы" бар екенін айтты, бірақ нақты қандай тәсілдер туралы сөз болғанын нақтыламады. Сонымен қатар, Багай Иранның бейбіт ядролық энергияны дамыту құқығын сақтау маңызды екенін атап өтті.

    Егер АҚШ ирандықтарды осы құқықтан айыруды көздесе, бұл бүкіл келіссөз процесіне күмән тудырады, – деді ол.

АҚШ президенті Дональд Трамп та ядролық келісім бойынша Иранмен жүргізілген келіссөздерде "нақты прогресс" барын мәлімдеді. Ол өткен келіссөздерді "өте жақсы" деп бағалады.

Айта кетейік, Иран мен АҚШ арасындағы ядролық келіссөздер бірнеше жылдардан бері түрлі кезеңдерде жалғасып келеді. Тараптар арасындағы басты мәселе – Иранның уран байыту деңгейі мен халықаралық бақылаушыларға қолжетімділік мәселесі.