Ардагерлер ардақталды
Аудан әкімі Мейрамбек Шермағанбет 7 мамыр – Отан қорғаушылар күні және Ұлы Жеңістің 80 жылдық мерекесіне орай сұрапыл соғыс жылдары аянбай еңбек еткен тыл еңбеккерлері мен Тәжік-Ауған шекарасындағы әскери қақтығыстарға қатысқан ардагерлермен кездесіп, оларға құрмет көрсетті.-Әрине, бұл халқымыздың батырлығы мен ерлігінің, отансүйгіштігі мен қайсар рухын көрсететін ерекше, қастерлі мерекелер. Тәуелсіздік тұғырының берік, еңсеміздің биік болуы, еліміздің дамуы мен туған жеріміздің гүлденуі – осынау жеңістің жемісі. Осындай мереке қарсаңында Сіздерге мықты денсаулық, шаңырақтарыңызға тыныштық пен береке тілеймін. Аспанымыз ашық, елдің іргесі берік, бейбіт өміріміз баянды болсын, - деген аудан басшысы, тыл еңбеккерлері мен ардагерлерін мерекемен құттықтап, шынайы лебізін жеткізді.
Сонымен қатар мерекелік кездесуде тыл ардагерлеріне Мемлекет басшысының жарлығы бойынша берілген «Ұлы Отан соғысындағы Жеңіске 80 жыл» мерекелік медалі берілсе, Тәжік-Ауған шекарасындағы әскери қақтығыстарға қатысқан ардагерлерге «Ардагерлер одағының Тәжік-ауған шекарасының жауынгерлік қимылдарына және әскери қақтығыстарына қатысушылардың» республикалық қоғамдық бірлестігінің «Қаһарман шекарашы» мерекелік төсбелгілері табысталды.
Кездесу соңында аудан өнерпаздары мереке иелеріне арнап ән шырқап, мерекелік көңіл-күй сыйлады.
