125 жастағы ер адам ұзақ өмір сүрудің құпиясымен бөлісті
Фото: E.Sikorskaya/Globallookpress
Перу азаматы Марселино Абад Толентино өзінің 1900 жылдың сәуір айында дүниеге келгенін айтады. Егер бұл мәлімет рас болса, ол қазіргі таңда жер бетіндегі ең қарт адам болуы мүмкін, деп хабарлайды BAQ.KZ.
Қазір қария Уануко қаласындағы қарттар үйінде тұрады, арбамен қозғалады, алайда айналасындағы адамдармен қуана тілдесіп отырады.
Ұзақ жасауының себебін ол өмір салтымен байланыстырады. Әсіресе, тамақтану тәртібіне баса мән береді. Оның айтуынша, өмір бойы өз бақшасында өсірілген табиғи өсімдіктерді тұтынған. Сонымен қатар, ет тағамдарын, әсіресе қой етін де жегенін айтады.
Марселино өмір бойы түрлі жұмыс атқарған, ата-анасынан ерте айырылып, өз көзімен талай тарихи оқиғаның куәсі болған. Сонымен қатар, ол үнемі дене белсенділігін сақтап, табиғатпен етене өмір сүріп, серуендеуді әдетке айналдырған.
Mirror басылымының хабарлауынша, қария ұзақ жылдар бойы өз фермасында тұрып келген, ал қарттар үйіне тек өз-өзіне күтім жасай алмай қалғаннан кейін ғана көшкен.
Ол ұзақ жасаудың басты үш себебін атап көрсетеді. Олар: дұрыс тамақтану, қимыл-қозғалыс пен өмірге деген оң көзқарас.
Бұған дейін 112 жасқа жеткен жапон азаматы да өз құпиясымен бөліскен болатын. Оның айтуынша, ол үнемі жымиып жүреді және ешқашан ашуланбайды.
Ғалымдар сонымен қатар жер бетінде ұзақ жасаушылар көп шоғырланған "көк аймақтарды" (blue zones) атады.
Мұндай бес аймақ бар: Жапониядағы Окинава аралы, Италия мен Грециядағы Сардиния және Икария аралдары, Коста-Рикадағы Никоя түбегі және АҚШ-тың Калифорния штатындағы Лома-Линдада орналасқан діни қауымдастық.
Италиялық зерттеушілер бұл аймақтардағы тұрғындардың өмір салтын егжей-тегжейлі зерттеп, олардың тамақтану жүйесіндегі ортақ ұқсастықтарды анықтаған. Бұл мәліметтер геронтологияға арналған Ageing Research Reviews журналында жарияланған.
Пікір 1