Трамптың санкциясына Қазақстанның қандай тауарлары ілінеді?

Фото: Айбар Олжаев
Қаржы саласының маманы Айбар Олжаев Трамптың Қазақстанға салған санкциясына қатысты болжамын жасады, деп хабарлайды BAQ.KZ тілшісі.

АҚШ президенті Дональд Трамп Капитолийде отырып алып, бүкіл әлеммен сауда соғысын бастады. Ол импортты баж салығын көтерген елдің қарасы көп, тіпті ешқашан АҚШ-пен сауда жасап көрмеген шағын аралдар да қораға кіріп кетті. Қазақстан да өзінің 27% сыбағасын алып, енді онымен не істейміз деп отыр. Негізі ештеңе істемейміз. Қазақстанға салынатын пошлинадан бізге ыстық та емес, суық та емес. Біз АҚШ-қа жіберетін 2 миллиард долларлық экспорттың 92 пайызы шикізат – уран, мұнай, ферроқорытпалар. Ал ол баж салығына ілінбейді, - деді сарапшы.

Олжаевтың сөзінше, арнайы келісім бойынша салық режимі белгіленген тауардың бәріне. Ал олардың экспорттағы үлесі 2024 жылы 95,2 миллион долларды құраған.

Қазақстан мен АҚШ арасындағы тауар айналымы 4,2 миллиард доллар. Соның 2,2 миллиарды импортталатын тауар. Ал 2 миллиарды экспорт. Демек, 95 миллион дегенің 5 пайызға да жетпейді.

Айбар Олжаевтың айтуынша, 2024 жылы Қазақстан мен АҚШ арасындағы тауар айналымы өсіп, біздің экспорт көлемі 30 пайызға ұлғайды. Бұл – жақсы көрсеткіш. Демек, жылдан-жылға мұхиттың арғы бетінен әкелетін тауарларымызға қарағанда, сататын дүниеміз көбейіп келеді деген сөз. Осыны жалғастыра беру керек.

Трамп шешімі әлем экономикасының өсуіне кедергі болып, өндіріс баяулап, соның кесірінен шикізатты тауарлы нарықтар құлай бастайды деген қатер бар. Және негізсіз емес. Ең басты қауіп – мұнай бағасының барреліне 65 доллардан төмен құлап кетуі. Бұл Ұлттық қор түсіміне үлкен соққы болады. Сол Ұлттық қорымыз екінші бетіне де соққы алуы мүмкін. Жетекші биржалардың индекстері қызыл зонаға кіріп, ірі компаниялар акциялары арзандай бастайды деген күдік күшейіп келеді. Онда Ұлттық қордың акцияларда жатқан инвестпортфеліне қауіп төнеді. Бірақ дәл қазір жағымсыз коррекцияның нақты көлемін дәл болжау қиын, - деп айтты сарапшы.