ҚАЗАЛЫ ВАГОН ЖӨНДЕУ ДЕПОСЫНДА ЖАҢА ЦЕХ ІСКЕ ҚОСЫЛДЫ
Қазалы ауданындағы теміржол мекемесі «Қамқор вагон» жауапкершілігі шектеулі серіктестігінің Қазалы вагон жөндеу депосында «Вагон-доңғалақтарын жөндеу шеберханасы» цехы ашылды.Кәсіпорындағы жаңа цехтың іске қосылуына орай арнайы шара өтіп, теміржол саласының қызметкерлері мен ардагерлері марапат төрінен көрінді. Өнідіріс орнында өткен шараға ҚТЖ Жүк тасымалы АҚ-ның атқарушы директоры Қайраткен Сағатұлы мен «Қамқор вагон» ЖШС-нің Бас директоры Сәкен Көптілеуұлы және еліміздің өзге де өңірлеріндегі теміржол мекемелерінің басшылары қатысты.
Бүгінде өңірдегі теміржол саласында елдің игілігіне бағытталған ауқымды жобалар жүзеге асуда. Мәселен, биыл Қазалы ауданындағы тарихи ғимарат – теміржол вокзалына күрделі жөндеу жұмыстары жүргізілетін болса, вокзал жанындағы теміржол үстінен өтетін жаяу жүргіншілер көпірінің құрылысы басталды.
Мұнан бөлек бүгін аудан тарихындағы алғаш рет Ақтөбе-Қазалы бағытындағы жаңа жолаушылар пойызы ауданға келуде.
Біздің өңіріміздегі шойын жол бойындағы ұжымдардың бүгінде қол жеткізген өзге де табыстары жетерлік. Республиканың әр аймағынан алынған тапсырыстар уақытылы орындалып, қызметкерлер жемісті еңбек етуде. Алдағы уақытта да экономиканың күретамыры саналатын теміржол саласында елдің игілігіне бағытталған жемісті жұмыстар жалғасын таба бермек.
