Қазақстанда дәрігерлердің жалақысы 2,3 есе өскен
Фото: BAQ.KZ - архивБұл туралы Мәжілістегі Үкімет сағатында Денсаулық сақтау министрі Ақмарал Әлназарова айтты, деп хабарлайды BAQ.KZ тілшісі.
Министрдің сөзінше, соңғы 10 жылда денсаулық сақтау саласын жетілдіру мақсатында жүргізілген бірқатар ауқымды реформа нәтижесінде халық денсаулығының негізгі көрсеткіштері оң нәтижеге ие болды.
Міндетті әлеуметтік медициналық сақтандырудың енгізілуі денсаулық сақтау саласын қаржыландыру көлемін 3 есе ұлғайтуға мүмкіндік берді, яғни 1 трлн-нан 2,9 трлн теңгеге дейін. Бұл саланың көптеген бағытын қаржылық ресурстармен барынша толықтырды. Оның ішінде дәрігерлердің жалақысы 2,3 есе өскендігін айтып кеткен жөн, - деді денсаулық саласының басшысы Үкімет сағатында.
Сонымен қатар тұрғындардың медициналық көмекке жұмсалатын қалта шығындары 34%-дан 28%-ға дейін азайған.
Министр атап өткендей, денсаулық сақтау саласындағы қаржыландырудың барлық көзінен бөлінетін шығыс көлемі жалпы ішкі өнімнің 4%-ын құрады.
Міндетті әлеуметтік медициналық сақтандыру жүйесінің енгізілу мерзімі COVID-19 пандемиясымен қатар келді. Сонымен қатар жарнапұлдардың бастапқы параметрлері 1,4 және 3,5 есеге қысқартылды. Атап айтқанда, мемлекеттен 3,5 есеге, ал жұмыс берушілер мен жеке кәсіпкерлерден 1,4 және 1,7 есеге. Бұл бюджеттің кіріс бөлігіне әсер етті. Мұндай жағдайда кіріс бөлікті кезең-кезеңімен ұлғайтып, жарнапұлдардың бастапқы параметрлерін қайтару немесе қабылдаған кепілдіктерді қайта қарау керек, - деп санайды Ақмарал Әлназарова.
