Заңда электронды темекіні өндіруге, сақтауға, елге әкелуге және шығаруға болмайды деп көрсетілген. Елдің Денсаулық сақтау министрлігінің дерегінше кейінгі 2 жылда Өзбекстан шеттен құны 30 млн долларға электронды темекі импорттаған. Контрабандалық жолмен тасымалданған тауар да аз емес. Өзбекстан Денсаулық сақтау министрлігінің дерегінше электронды темекіні ересектерге қарағанда жасөспірімдер көп тұтынады.

Мектептерге жүргізілген рейд барысында оқушылардың шылымға деген әуестігі жыл сайын артып барады екен. Мәселен 2019 жылы 6 дерек тіркелсе, 2023 жылы көрсеткіш мың оқушыдан асқан.

Электронды темекіні тұтынатындардың дені жастар болса, оның ішінде қыздарымыз да бар. Жастар - бұл біздің болашағымыз, - деді Милий Мәжілісінің депутаты Алишер Кадыров.

Егер қазір шұғыл әрекет жасамасақ, 20 жылдан кейін ешқандай заң да, мемлекеттік бағдарлама да бізге көмектесе алмайды. "Милий тикланиш" демократиялық партиясының депутаттары электронды темекіге тыйым салу туралы ұсынысты 2021 жылы көтергендерін, алайда оны Сенат қайтарып жібергенін еске салды.

Орталық Азияның 3 мемлекеті Қазақстан, Қырғызстан, Түркіменстан былтыр электронды темекіге заңды түрде тыйым салды. Тәжікстанда тек белгіленген жерлерде ғана шегуге рұқсат бар.

Өзбекстанның билік партиясы бастамашылық жасаған заң жобасы кешікпей қабылдануы мүмкін. Сөйтіп электронды темекіге тыйым салған әлемнің 40 мемлекетінің бірі болмақ.