Елімізде тиімді колледждердің экожүйесі құрылады
Оқу-ағарту министрі Ғани Бейсембаев Үкімет отырысында «Жұмысшы мамандықтар» жылында кәсіптік-техникалық білім беру жүйесі қалай реформаланатынын айтты.
Фото: Талғатжан Мұхаметбекұлы/Kazinform— Бізге техникалық білім жүйесінің реформасы қажет. Осы бағытта қандай жұмыс атқарылып жатыр, — деп сұрады Премьер-министр Олжас Бектенов.
Министр Ғани Бейсембаев бұл бағытта арнайы жол картасы бекітілгенін мәлім етті.
— Жалпы осы «Жұмысшы мамандықтар» жылы аясында кәсіптік-техникалық білімді трансформациялауға басымдық беріледі. Бұл бағытта министрлік мүдделі мемлекеттік органдармен бірге кадр даярлаудың сапасын арттыру, цифрлық технологияларды және халықаралық стандарттарды ыңғайластыру және жалпы колледж, бизнес, ЖОО-лардың ынтымақтастығын күшейту бағытында жол картасын бекітіп отыр. Бұл Жол картасы тиімді колледждердің экожүйесін құруға нәтижелі көмек береді деген үміт бар, — деді ведомство басшысы.
Еске салсақ, бұған дейін жекеменшік және мемлекеттік колледж педагогтерінің жалақысы теңестірілетінін жаздық. Сонымен қатар, Президент Жарлығымен 2025 жыл «Жұмысшы мамандықтарының» жылы деп жарияланған еді.
