Ұшақ апатының себебін үкіметтік комиссия анықтайды
Үкімет қаулысымен Ақтау қаласы әуежайы маңында Az Airlines әуекомпаниясының Эмбрайер 190 ұшағының апатқа ұшырау себебін тергеу жөніндегі Үкіметтік комиссия құрылды. Тиісті Қаулыға Премьер-министр Олжас Бектенов қол қойды.
Фото: ҚР ҮкіметіКомиссия құрамына Премьер-Министрдің орынбасары, Маңғыстау облысының әкімі, Төтенше жағдайлар, Көлік, Сыртқы істер, Ішкі істер, Еңбек және халықты әлеуметтік қорғау, Денсаулық сақтау министрліктерінің басшылығы, Бас көлік прокуроры кіреді.
Комиссияға оқиға орнына дереу ұшып кету, ұшақтың құлау себебін жан-жақты тергеуді қамтамасыз ету, қаза тапқандар мен зардап шеккендердің отбасыларына бірінші кезектегі көмекті көрсету жөнінде шаралар қабылдау тапсырылды.
Қазақстан Үкіметі Әзербайжан Үкіметімен оқиғаның себебіне жан-жақты тергеу жүргізу және бірінші кезектегі көмек көрсету бойынша ынтымақтастық орнатады.
Айта кетейік, Ақтауда Azerbaijan Airlines ұшағы апатқа ұшырады.
Оқиға орнына ҚР Төтенше жағдайлар министрлігі жеке құрамының 52 адамы мен 11 бірлік техникасы барды.
Апатқа ұшыраған ұшақ бортында Қазақстанның 6 азаматы болды.
ҚР Көлік министрлігі мәлім еткендей, Әзербайжан тарапының алдын ала ақпараты бойынша, бортта 62 жолаушы мен 5 экипаж мүшесі болған. ҚР Президентінің тапсырмасымен Мемлекеттік комиссия құрылды.
