Қазақстанның транзиттік әлеуетін нығайту мәселесі талқыланды

Қазақстан - Еуропа мен Азияны байланыстыратын маңызды транзиттік мемлекет. Десе де, депутаттардың пікірінше, осындай стратегиялық мүмкіндік жеткілікті деңгейде пайдаланылмай отыр.

Қазіргі уақытта отандық тасымалдаушылар автопаркті жаңарту барысында қатаң экологиялық стандарттарды (кем дегенде Еуро-4) сақтауға міндетті, яғни одан төмен деңгейдегі автокөлікті әкелуге тыйым салынған. Ал шетелдік тасымалдаушылар Қазақстан жолдарында кез келген экологиялық стандарттағы автокөліктерді еркін пайдаланады. Депутаттар мұндай олқылықтар отандық бизнесті теңсіз жағдайға қойып, дамуына кедергі келтіретінін айтып, министрліктің назар аударуын сұрады.

Мәжілісмендер отандық және шетелдік тасымалдаушыларға қойылатын талаптың алшақтығына наразылық білдіріп, кейінгі 15 жылда осы теңсіздікті жоюға арналған шаралар қабылданбағанын айтты.

Ал әуекомпаниялары қолданылғанына 25 жылдан асқан ұшақпен жүк тасымалдауға тыйым салынғанмен, бұл норма адам тасымалында ескерілмейтінін де атап өтті.

Бұл талаптар Халықаралық азаматтық авиация ұйымының (яғни ИКАО) стандарттарына сәйкес келмейтіні анық. Депутаттар осы мәселеге көңіл аударып, министрден мұндай жағдай қалыптасуына неліктен жол берілгенін сұрады.