Елімізде 50 мыңға жуық адам баспана кезегінен шығарылды

Фото: Halyq Uni

Бүгінде 50 мыңға жуық қазақстандық баспана кезегінен шығарылды. Бұл туралы Өнеркәсіп және құрылыс вице-министрі Қуандық Қажкенов айтты, деп хабарлайды Halyq Uni.

Оның айтуынша, баспана кезегінде тұрғындарға үй беру мәселесіне әкімдіктер жауап береді. Тізімді өзектендіру жұмысы жылына бір рет жүргізіледі.

Қазір 650 мыңнан аса адам тұрғын үй кезегінде тұр. Тізімді өзектендіру бойынша ауқымды жұмыс жүргізілді. Нәтижесінде 50 мыңға жуық адам баспана кезегінен алынып тасталды. Олар – үй алғандар, басқа өңірге көшкендер және жаңа орында тіркеуге тұрмаған азаматтар. Олардың орнына баспанаға мұқтаж басқа адамдар кезекке қойылды, – деді Қуандық Қажкенов Үкіметтің баспасөз орталығында.

Бұған дейін 50 мыңнан аса қазақстандық жалға берілген үйді жекешелендіре алатыны хабарланған еді.