Саябақта серпін бар
Қазалы ауданының сәулеттік келбетін көркейту мақсатында ауқымды жұмыстар жүргізіліп жатыр. Аумақты құрылыс бойынша қалыпты пайдалану үшін жарамды жағдайға келтіруде игілікті істер қолға алынды. Осыған орай «Жеңіс» саябағы толығымен қайта жаңғыртылады.Табиғи немесе арнайы отырғызылған өсімдіктері бар жолдармен, аллеялармен, су қоймаларымен жабдықталған. Демалуға және серуендеуге арналған, рельефке бағынатын ойластырылған ландшафты дизайны бар ашық жасыл аймақты саябақ дейміз. Әдетте саябақтарды мемлекет күтіп ұстайды және барлығына демалу үшін беріледі. Сол үшін аудан әкімдігінің тапсырысымен қомақты қаржы бөлініп, «Жеңіс» саябағында қазалылықтар емін-еркін басқосатын, жанға жайлы демалыс орнына айналдыруға күш салынып жатыр.
Қазір мұнда негізгі жол құрылысы бітуге жақын. Жоба бойынша саябақты жағалай айналма жол төселеді. Өз кезегінде бұның да халықтың салауатты өмір салтын қалыптастыруға септігі мол болмақ. Саябақта балаларға арналған ойын алаңдары мен жаттығу жасайтын жабдықтар қойылады. Сонымен бірге волейбол және футбол ойын алаңдары түседі. Бұл өз кезегінде үлкендердің келуіне де сеп болады.
Бұдан бөлек сырттан келушілер мен аудан тұрғындары және жастар суретке түсуге қолайлы монументтер, хан тағы және Қазақстан қалалары көрсетілген карта макеті орналастырылады. Мамандардың айтуынша, халықтың алаңсыз демалуы үшін көлеңкелі орынжайлар мен арнайы әжетхана да салынады. Сонымен қатар қазалылық кәсіпкерлердің ұсынысымен жаздық бассейін де құрылады деген жоспар бар. Бұған қоса шырша, қарағай, туя сынды он түрлі ағаш егіледі деп көзделуде.
Айнұр ҚАЗМАҒАМБЕТОВА
