Шаһар келбетін әрлеуге атсалысты
Қоршаған ортаның тазалығына жауапкершілікпен қарау – әрбір азаматтың басты міндеті. Осы орайда күзгі санитарлық-тазалық жұмыстары ұйымдастырылды. Сенбілік шаһар тынысының кеңеюіне үлесін қосуда.
Бұл жолғы тазалық жұмыстары барысында барлық мекеме ұжым қызметкерлері Әйтеке би кентіндегі «Жеңіс» саябағына жұмылдырылды. Ортақ күш-жігермен жергілікті аумақты тез арада ретке келтіруге болады.
Қатысушылар жұмыс құрал-саймандарын, сыпырғыштар мен тырмаларды бірге бөліп, аумақты тазалау жұмыстарын жүргізді. Олар шөптер мен жапырақтарды, тұрмыстық қоқыстарды алып тастады.
Сенбілік барысында саябақ ішіндегі қураған ағаштар шабылып, ағаштардың түптері сондай-ақ аяқ су арықтары тазаланып, басқа да тазалық жұмыстары жасалды.
Аудан орталығы Әйтеке би кентіндегі мекеме-кәсіпорындар 7 аймаққа бөлініп, тиісті тазалық жұмыстарын жүргізді. Тазалық жұмыстарына аудандағы барлық елді мекендер де тартылды.
Тазалық шараларына 114 мекемеден 1933 қызметкер қатысып, 17 техника жұмылдырылды. Келешек мәдени-демалыс орнына айналуы тиіс саябақтан 14,7 тонна бей-берекетсіз қоқыс жиналып, арнайы орынға шығарылды.
Сенбілік – тазалық кепілі. Әр адам сенбілікке кішкене де болса атсалысып, үлесін қосса тазалыққа деген жауапкершілігі де арта түседі. Олар сенбілікке шығу арқылы тазалыққа деген жауапкершілікті нығайтады.
Айнұр ЖИЫЛЫСҚЫЗЫ
