Қазақстанда қандай азық-түлік қымбаттауы мүмкін?
Фото: Tengrinews.kz/ Тұрар ҚазанғаповВице-премьер Серік Жұманғарин доллар бағамы өсуіне байланысты Үкімет азық-түлік бағасын қалай тежейтінін айтты, - деп хабарлайды Massaget.kz.
Үкіметтегі брифингте Жұманғарин бүгінде Қазақстан әлеуметтік маңызы бар тауарлардың 10 түрі бойынша өзін 100 пайызға қамтамасыз ететінін айтты. Олардың ішінде ұн, тұз, күріш, макарон, май, картоп, қой еті, сиыр еті, сәбіз бар.
"Азық-түліктің 14 түрі бойынша 80 пайызға және одан да көп қамтамасыз етілген. Ал 5 түрі бойынша импортқа тәуелділік бар: құс етімен өзімізді 73 пайызға қамтамасыз етеміз; шұжықпен 60 пайызға, балықпен 60 пайызға, ірімшік пен сүзбемен 46 пайызға, қантпен 44 пайызға қамтамасыз етеміз. Мұнда белгілі бір деңгейде қауіп бар. Әрине, Қазақстанда өндірілмейтін көкөністер мен жемістердің кейбір түрлері, мәселен, апельсин, банан, лимон және т.б. болуы мүмкін... Бұл өнімдер қымбаттауы мүмкін. Бірақ шамалы", - деді Серік Жұманғарин.
Шенеунік дүкендердегі бағаларға жасалған соңғы мониторингке сәйкес, кейінгі аптада "ештеңе қымбаттамағанын" жеткізді.
