Қазақстан тағы бір африкалық елмен визасыз режимге қол жеткізді
Ашық дереккөзденҚазақстан мен Сьерра-Леоне дипломатиялық және қызметтік паспорттардың иелерін визалық талаптардан босату туралы келісімге қол қойды, деп хабарлайды Ulysmedia.kz.
Қазақстан Республикасының Сыртқы істер министрлігі мұндай келісімге БҰҰ Бас Ассамблеясы 79-сессиясының шеңберінде өткен кездесулер барысында қол қойылғанын мәлімдеді.
“Қазақстан мен Сьерра-Леоне дипломатиялық және қызметтік паспорттардың иелерін визалық талаптардан босату туралы келісімге қол қойды” делінген сыртқы істер ведомствосының ақпаратында.
Сондай-ақ Қазақстан Республикасы Премьер-министрінің орынбасары – Сыртқы істер министрі Мұрат Нұртілеу БҰҰ Бас Ассамблеясы шеңберінде Ең аз дамыған елдер, теңізге шығатын жолы жоқ дамушы елдер және шағын аралдық дамушы мемлекеттер мәселелері бойынша БҰҰ-ның Жоғары өкілі Рабаб Фатимамен де кездесу өткізген.
ҚАНДАЙ ЕЛ?
Сьерра-Леоне – Атлант мұхиты жағалауындағы батыс Африка мемлекеті. Астанасы – Фритаун, ресми тілі – ағылшын тілі. 1961 жылы Сьерра-Леоне Ұлыбританиядан тәуелсіздік алды. Ел 1990 жылдары азаматтық соғысты бастан өткерді, ол 2002 жылы аяқталды.
