Бұл зертхананың негізгі мақсаты – перинетальды диагностика, яғни, науқасты бастапқы кезеңінде анықтап береді. Мәселен, жүкті әйелдердің бойындағы баласының ақаулығы бар-жоғын анықтап береді. Әлемде маңыздылығын жоғалтпай отырған қатерлік ісіктер. Соның ішінде колоректальды рак, яғни, тік ішек ісігін бастапқы кезеңінде, яғни, әлі белгі бермеген сәтінде диагностикалап, адам өмірін сақтап қалуға үлес қосамыз деп үміттеніп отырмыз, – дейді Ерғали Әбдірайымов.

Оның сөзінше, қатерлік ісікті көбіне соңғы, емдеуге келмейтін кезінде ғана біліп жатамыз. Қазіргі зертхана соны қан құрамын зерттеп, қатерлі ісік бар-жоғын енді басталып жатқан сәтінде анықтап бере алады.

Холдинг басшысының айтуына, Еуропада да, Азия елдерінде де осы әдістер кеңінен қолданылып келеді.

Одан бөлек, ауыл шаруашылығы саласында орталықтың көптеген жетістігі барын айтты. Соның ішінде қызыл кітапқа енген өсімдіктерді, оның ішінде дәнді-дақылдар, өсімдіктерді сақтап қалуға көп көңіл бөлініп отыр.

Мәселен, қазір жоғалып бара жатқан жабайы алманың түрлері бар. Соларды осы Ұлттық биотехнология орталығының ғалымдары жандандырып, көбейтіп, қоршаған ортаға таралуына көп септігін тигізіп жатыр. Ауыл шаруашылығына қолданылатын арпа-бидайымыздың ауруларын зерттеп, төзімді сорттарын алу да бағыттардың бірі болып саналады, – дейді Ерғали Әбдірайымов.

Айта кетейік, Ұлттық биотехнология орталығы елдегі биологиялық бейіндегі жетекші ғылыми мекеме, Президент Жарлығымен 1993 жылы құрылған. Орталық биотехнология, биологиялық қауіпсіздік және экология саласындағы бағдарламаларды орындайды.