Зейнет жасына жақындаған азаматтарды жұмысқа алмаған компанияларға қандай жаза қарастырылған

Петропавл тұрғыны Бақытгүл Мемешованың келіні бір жылдан бері жұмысқа орналаса алмай қиналып жүр. Жұмысқа орналаса алмауының себебі – жүктілігі. Петропавл тұрғынының сөзінше, қызды бала көтергені үшін қызметке қабылдамау ақылға қонымсыз.

“Жұмысқа алмайды. Менің келінім жұмысқа кіре алмай отыр. Жұмыс істемейді. Аяғы ауыр деп ешкім алғысы келмейді. Неге алмайды? Ертең бірнеше айдан кейін декретке кетесің. Сенен қандай пайда депті”, – дейді Бақытгүл Мемешова.

Қазақстанда мұндай жағдайдан бөлек, зейнет жасына жақындаған азаматтар да жаңа жұмысқа орналаса алмай жүр. Сонымен қатар кей компаниялар баласы бар қыз-келіншектерді жұмысқа алмауға тырысады екен. Ел тұрғындары бұл дұрыс емес, жұмыс беруші ең әуелі қызметкердің қабілеті мен тәжірибесіне мән беру керек дейді.

Еңбек министрлігі және халықты әлеуметтік қорғау министрлігі басқармасының бас сарапшысы Самал Жұмағазиеваның сөзінше, Еңбек кодексіне сәйкес азаматтарды жұмысқа қабылдар кезде жасы, жынысы, ұлты, тіпті дене бітіміне байланысты алалауға тыйым салынған. Сондай-ақ бір лауазымға қабылданған екі азаматтың жалақысы екі түрлі болса да кемсіту болып саналады дейді маман.  

“Кемсіту жағдайлары болған жағдайда жұмыс берушілерге айыппұл салынады. Ол үшін белгілі бір лауазымға үміткер еңбек инспекциясына арыз жазу керек. Міндетті түрде жаза қарастырылған. Шағын кәсіпкерлер 30 АЕК. Орта кәсіпкерлік субъектілеріне 60 АЕК. Ірі кәсіпорындарға 100 АЕК айыппұл қарастырылған”, – дейді Жұмағазиева.

Жалпы, дискриминация мемлекеттік органдарда да кездеседі дейді ведомство өкілдері. Мұндай жағдайға жол берген мекеменің бірінші басшысына 110 мың теңге көлемінде айыппұл салынады екен. Сондықтан әр азамат өз құқығын заң аясында қорғауы керек.