Елімізде Үздіксіз білім беру қауымдастығы жұмыс істейді. Қоғамдық ұйым балаларды мектепке дейінгі ұйымдардағы зорлық-зомбылықтан қорғап, балабақша тәрбиеленушілеріне жайлы және қауіпсіз жағдай жасауға ұмтылады. Сондай-ақ ерекше балаларға, олардың ата-аналарына жан-жақты қолдау көрсетуді мақсат етеді. Бүгін ауданның бас ұстазы осы қауымдастықтың Қызылорда облысындағы филиал басшысы Наталья Мишукова мен жеке балабақша қызметкерлерімен кездесті.

Бөлім басшысы жиналғандарды алдымен қауымдастықтың құрылғанына 10 жыл толуымен құттықтады. Бұдан кейін жеке балабақша төңірегіндегі маңызды мәселелерге тоқталды.

— Аталған тақырыпта халық айтар сын жоқ емес. Біз тіпті күн сайын бөбектерге жасалатын игіліктің ауқымын арттырумыз керек. Сын айтылса, оны қабылдап, тез арада олқылықты қалыпқа келтірудің жолын іздеу маңызды. Онсыз дами алмаймыз.

Қазіргі таңда мектеп ішіндегі шағын орталықтардың жұмысын жеке балабақша ашу арқылы оңтайландыру күн тәртібінде тұр. Мұндай прогресс балаларымызға жасалатын жағдайды жетілдіреді. Әсіресе, мұндай нысандар ауылдық округтерде қат. Қазір аудан орталығында 11 жеке балабақша бар. Ендігі күшті ауылдарға салуымыз керек, — деді Ә. Оңдасынұлы.

Жиында қауымдастықтың Қызылорда облысындағы филиал басшысы Наталья Мишукова да өзекті жайттарды сөз қылды. Ол басқа аудандарда бала тәрбиесіне қатысты, балабақша жұмысын жүргізудегі кемшіліктерді атап өтті. Сонымен бірге аудандағы ұйымға мүше барлық жеке балабақша меңгерушілеріне ризашылығын білдірді.

Кездесу соңында бөлім басшысы бірқатар балабақша қызметкерлеріне Алғыс білдіріп, Наталья Мишуковаға естелік сыйлық табыстады.