Банк төрағасының мәлімдеуінше, тңге бағамы тамыздағы әлсіреуіне қарамастан, жыл басынан бері 1 доллар үшін 459,39 теңгеге дейін 0,7%-ке нығайды. Өткен айда теңгенің 3,0%-ке әлсіреуі доллардың жаһандық нығаюына байланысты болды.

Ұлттық қордан республикалық бюджетке трансфертті қамтамасыз ету аясында валюта сату теңге бағамына оң ықпал етті. Оның тамыз айындағы мөлшері 770 млн долларға жетті. Валюта бағамына квазимемлекеттік сектор субъектілерінің валюталық түсімді міндетті түрде сатуы жөніндегі норманы тамыз айында тоқтата тұруы да әсер етті. Тамызда бірыңғай жинақтаушы зейнетақы қорына 240 млн долларға валюта сатып алынды. Ұлттық банк еркін бағам белгілеу режимін ұстанады және валюталық интервенциялар жүргізбейді, - деді Тимур Сүлейменов.

Сондай-ақ Сүлейменовтың айтуына қарағанда, тұрғын үй коммуналдық қызметтер тарифінің өсуіне байланысты ақылы қызметтер инфляциясы жеделдей түсті.

Тарифтер тамызда 6,1%-ке, жылдық көрсеткіште – 13,9%-ке өсті. Сонымен қатар халықтың тұрақты сұранысына байланысты реттелмейтін қызметтердің бағасы өсімін сақтап қалып отыр. Оның ішінде – қалалық автокөлікпен жол, ұялы байланыс қызметтері мен жалдау ақысы, - деп мәлімдеді ол Үкімет отырысында.