Мемлекеттік кірістер комитетінің мәліметінше, биржалық металдар бойынша салық 50%-ға (алтын, күміс, алюминий, мыс, мырыш, уран); биржадан тыс жекелеген металдар бойынша (темір/темір рудасы, хром және хром рудасы, марганец және темір-марганец рудасы, платина, ванадий, висмут, мышьяк, вольфрам, палладий, қалайы, никель, титан, магний, кобальт, сурьма) 30%-ға өскен.

«Сондай-ақ, Мемлекет басшысының 2022 жылғы 11 қантардағы тау-кен секторының жаңа кен орындарын барлау және игеру үшін қосымша жеңілдіктерді пысықтау қажеттігі туралы тапсырмасы аясында Салық кодексінің 746-бабының 3-тармағында көзделген шарттарды бір мезгілде сақтай отырып, өнеркәсіптік өндіру басталған сәттен бастап алпыс ай ішінде пайдалы қазбаларды өндіруге салынатын салықтың 0 пайыз мөлшерлемесін қолдану көзделген. Егер тау-кен секторының кен орны (жер қойнауын пайдалануға арналған бір келісімшарт бойынша кен орындарының тобына, кен орнының бір бөлігіне) рентабельділік деңгейі 5 пайыз және одан аз болса, ҚР Үкіметі айқындаған өлшемшарттарға сәйкес келсе, 2022 жылғы 31 желтоқсандағы жағдаймен Салық кодексінде белгіленген пайдалы қазбаларды өндіруге салынатын салық ставкаларын қолдану құқығы берілді», - деп жазды ведомстводан.

Салық кодексінің 745-бабы 6-тармағына минералдық шикізатты сату толық болмаған кезде кен орнында есептен шығарылған қорлар құрамынан алынатындарын (ысыраптарды қайтару) қоспағанда, пайдалы қазбалары бар минералдық шикізаттың құнын айқындау мақсатында өзгерістер енгізілді.