Еңбек министрлігіне жұмыс орнында этносаралық кемсітушілікті болдырмау құзыреті берілмек
Еңбек және халықты әлеуметтік қорғау министрлігіне жұмыс орындарында ұлты мен тіліне қатысты кемсітушілік әрекеттеріне жол бермеуді қамтамасыз ететін құзырет берілмек. Мұндай ұсыныс Ашық НҚА сайтында жарияланған Үкімет қаулысында көрсетілген, деп хабарлайды inform.kz.«Еңбек және халықты әлеуметтік қорғау министрлігі туралы ережесінің 15-тармағы тең мүмкіндіктер, толеранттылық қағидаттарын сақтау мен әлеуметтік, нәсілдік, ұлттық және тілдік белгілері бойынша құқықтарға нұқсан келтіруге жол бермеуді қамтамасыз ету, сондай-ақ әлеуметтік-еңбек қатынастарында этносаралық және өзге де кез келген кемсітушіліктің туындауының алдын алу тармақшасымен толықтырылсын. Бұған қоса, өтініш берушілер көтеретін жүйелі проблемаларды талдау және анықтау жұмыстары ұйымдастырылсын», - деп көрсетілген құжатта.
Аталған өзгерісті енгізу 2022 жылғы 25 мамырдағы Қазақстан халқы Ассамблеясының XXXI сессиясында жүктелген міндеттерді орындау мақсатында қолға алынған. Қаулыны ашық талқылау 4 қарашаға дейін жалғасады.
