«Біз зейнет жасындағы әйелдерді барынша көп жұмыспен қамту мақсатында «Күміс жас» жобасының тетіктерін қарастырып жатырмыз. Атап айтқанда, жобаға қатысу мерзімін үш жылға дейін ұлғайтып, әйелдерді жұмыспен қамтудың арнайы бағыттарын қарастырып, олардың жалақысын бюджеттен ішінара субсидиялауды көздеп отырмыз. Бұл олардың зейнетке шыққанға дейін жинақтаушы зейнетақы жүйесіне барынша белсенді қатысуына мүмкіндік береді. Бұл, әсіресе, еңбек өтілі аз, тиісінше, БЖЗҚ-да елеусіз жинақтары бар әйелдер үшін өте маңызды» деді министр Дүйсенова зейнет жасын төмендету әйелдер қозғалысының белсенділерімен кездесу барысында.

Сондай-ақ, базалық және ынтымақты зейнетақы тағайындау кезінде параметрлерді өзгерту жоспарланып отырғаны белгілі болды. Министрдің айтуынша, бұл келесі жылдан бастап бюджеттен төленетін зейнетақы төлемдерінің көлемін арттырады.

«Оң әсерді қазіргі зейнеткерлер де, болашақта зейнетке шығатындар да сезінеді» деп қосты Дүйсенова.