Ардақты азамат 63 жаста
Аудан әкімі Мұхтар Оразбаев Қазалы ауданының Құрметті азаматы, ҚР Мәдениет саласының үздігі Әлімжан Жарылқағановты қабылдап, 63 жасқа толған мерейтойымен құттықтады.Қабылдауда Мұхтар Әуесұлы мерейтой иесінің қатардағы қарапайым жұмысшыдан бастап басшылыққа дейінгі барлық сатыдан өтіп, абыройлы еңбек еткенін атап өтті.
– Сізді жерлестеріңіз қаламы жүйрік журналистен бөлек, Ішкі істер және Әділет министрліктерінде көп жыл қызмет еткен тәжірибелі маман ретінде жақсы біледі әрі құрмет тұтады. Сіз Қазалы жерінде де еңбек етіп, ауданның әлеуметтік-экономикалық дамуына сүбелі үлес қостыңыз. Әр іске жауапкершілікпен қарайтын қасиетіңіздің, еңбекқорлығыңыздың арқасында биік белестерді бағындырдыңыз, – деген аудан басшысы Әлімжан Мұратбайұлының иығына қазақы шапан жапты.
Сондай-ақ, ардақты азаматтың жары Маржан Қайырсапақызына да камзол кигізіп, ақ орамалды тарту етті.
Басқосуда аудандық мәслихат хатшысы Бақытжан Жарылқап жүрекжарды лебізін жеткізіп, мерейтой иесін құттықтады.
Ж.СОВЕТҰЛЫ
