– Қазір елде эпидемиологиялық жағдай жақсы емес. Республиканың үш қаласы мен тоғыз өңірі және біздің облыс коронавирустың таралу көрсеткіші бойынша «қызыл» аймақта тұр. «Сары» аймақта Алматы және Жамбыл облыстары. Түркістан мен Шығыс Қазақстан облыстары «Жасыл» аймақта.

Кешегі күнгі мәлімет бойынша Қызылорда облысында 70 жағдай тіркелген. Оның 3-уі біздің ауданнан. Байқағандай індеттің үдеуі басылмай тұр. Вакцинациялау – вирустың таралуын азайтудың жалғыз жолы екенін денсаулық сақтау саласының мамандары, эпидемиологтар дабыл қағып айтуда. Дегенмен екпе салдыруға асығатындар қатары өте төмен, – деді аудан әкімі.

Мұнан соң ауданда вакцина дозасы жеткілікті екенін айтып, бұл іске немқұрайлы қарамауды тапсырды. Әсіресе, адам көп шоғырланған Қазалы қаласы мен Әйтеке би кентінде вакцина егу жұмыстары бір сәтке толастамау қажеттігін қатаң тапсырды.

– Індеттен құтылудың әзірге жалғыз жолы бар. Ол – вакцина салдыру. Қалыпты өмірге қайта оралу үшін екпенің маңызы зор деп есептеймін. Әр азамат өз денсаулығына, отбасына жауапты. Жалпы, ауырмайтын жол – тазалық, салауатты өмір салты, күтім, иммундық ахуалды ұдайы бақылап отыру. Осы қарапайым нәрселерді ұмытпасақ, еліміз аман, жұртымыз тыныш болады, – деген аудан әкімі Мұхтар Оразбаев мәжілісті қорытындылады.