Кездесуде облыс әкімі мерейтой иесінің Сыр өңірінің өркендеуіне қосқан үлесі мен ерен еңбегі жайлы айтып өтті.

– Ел, мемлекет ісіне ерте ара­ласқан Алмагүл Божанқызының атына қандай мақтау айтсақ та, жарасымды. Ол биліктің биік баспалдақтарынан абыройлы өтіп, Тәуелсіздік жылдарында еліміздің әлеуметтік-экономикалық дамуы­на бар ынта-жігерімен қызмет етті. Шын мәнінде, оның Сырдария ау­данына басшылық жасаған уа­қыты тәуелсіздіктің алғашқы қиын ке­зеңдерімен тұспа-тұс келген күрделі жылдар болатын. Туған жеріндегі табанды еңбегінің нәти­жесінде Сыр­дария ауданы сол жылдары облыста үздіктер қатарынан көрінді, эко­номикалық көрсеткіштер бойынша көш бастады. Сіздің ізгілікке толы жарқын ғұмырыңыз – кейінгі жастарға үлгі-өнеге болатындай ғибратты жол. Мерейтойыңыз құтты бол­сын, – деді облыс әкімі.

Алмагүл Божанова 1946 жылы Тереңөзек кентінде дүниеге келген. Еңбек жолын Шаған ауылында балабақша меңгерушілігінен бастаған. Комсомол және партия комитеттерінде жауапты қыз­мет­тер атқарған. Тереңөзек ауда­нының әкімі қызметінде халықтың әлеуметтік жағдайын жақсартуға, ауыл шаруашылығы саласын кө­теруге баса назар аударды. Облыстық мәслихат хатшысы қызметінде де ерекше қарым-қабілетін көрсетіп, атқарушы органдармен бірге аймақтың даму жолында еселі еңбек етті. «Nur Otan» партиясы облыстық филиалы төрағасының орынбасары болған уақытта да билік пен халық арасында ашық диалог орнатып, сая­си ұйымның рөлін күшейтуге бар күш-жігерін жұмсады. Қазіргі таңда қоғамдық бағытта игі істер атқарып келеді.

Кездесуде аймақ басшысы мерейтой иесіне ҚР Парламенті Сенатының төрағасы Мәулен Әшімбаевтың құттықтау хаты мен өңірдің ең жо­ғары наградасы – облыстың Құрмет грамотасын табыстады және дәстүрге сай қамзол кигізіп, құрмет көрсетті.

Жылы жүздесуде мерейтой ие­сінің замандастары, еңбек арда­гері Қорғанбек Қайруллаев, облыс­тық әйелдер кеңесінің төрайымы Райкүл Байназарова сөз алып, Алмагүл Божанқызының қазақ қы­зына тән қайсарлығы мен еңбек­тегі ерлік істері жөнінде жылы есте­ліктер айтып, лебіздерін білдірді. Мерейтой иесі аймақ басшысына, ел азаматтарына алғысын айтты.