«Елбасы медалін» 62 оқушы иеленді
Жаңашылдыққа жаны құмар, танымдық білімін арттыруға ниетті жастарға арналған «Елбасы медалінің» қола жүлдегерлері анықталды. Үздіктер қатарында көрінген қызылордалық 62 оқушы аталған медальді иеленді.Салтанатты шарада білім басқармасының басшысы Ақзира Қасымова жоба аясында белсенділік танытып, өз қабілетін көрсете білген озық ойлы оқушыларға сәттілік тіледі.
– Тұңғыш Президент қорының бастамасымен қолға алынған «Елбасы медалі» – жастарды кешенді деңгейде қолдауға арналған бірегей жоба. Біздің өңірімізде талантты, кітап оқуға ынталы, спортқа әуес, шығармашылыққа бейім, жаңа идеяларды іске асыруға епті жастарымыз аз емес. Міне, сол үздіктердің ішінен 62 оқушы қола жүлдегер атанып отыр. Оның алғашқы 11-не медальді облыс әкімі өзі табыстап, құрметін жеткізген еді. Енді Қызылорда қаласының 30 оқушысы медаль иегері атанып отыр. Аудандардағы 21 оқушыға аудан әкімдері табыстайтын болады, – деді басқарма басшысы.
Университет, колледж, мектеп оқушылары арасынан жобаға қатысып, талаптарды үздік орындаған оқушылар лайықты құрметке ие болды. Айта кетейік, «Елбасы медалі» жобасына өңірден 430 оқушы қатысты.
Мұнан бөлек, «Мың бала» Ұлттық зияткерлік олимпиадасында ауыл мектептерінен барлығы 18 мыңнан астам оқушы бақ сынап, оның 75-сі жеңімпаз атанды. Нақты кезеңде осы үздік жастардың 23-і дарынды балаларға арналған мектептерге конкурстан тыс қабылданып, Елбасы академиясы жанындағы «Бірге оқу» онлайн мектебінде пәндік дайындықтан өтуде.
syrboyi.kz
