Әлеуметтік саладағы ең маңызды бағыт – денсаулық сақтау қызметінің сапасы мен оның қолжетімділігін қамтамасыз ету. Бұл жөнінде Қазалы ауданының әкімі халық алдындағы қорытынды есебінде мәлім етті.

Оның айтуынша, мемлекеттің қолдауымен соңғы бес жылда ауданда 11 денсаулық сақтау нысаны салынды. Оның 10-ы дәрігерлік амбуллатория,1-і аудандық аурухана (1991-2017 жылдары 21 нысан салынған.)

Қазір аймақ басшысының қолдауымен жаңа ауруханаға құны 400 млн теңге тұратын «Ангиограф» медициналық аппараты алынуда. Бұл қондырғы жедел және сапалы ота жасауға септігін тигізіп , Қазалыдан бөлек, көршілес Қармақшы, Арал аудандары мен Байқоңыр қаласы тұрғындарына қызмет көрсететін болады.

Осындай қолдаулардың нәижесінде, ауданда жыл көлемінде ана өлімі тіркелмеген. Сәби өлімі өткен жылмен салыстырғанда 0,5 промильге төмендеді.2017 жылы 1702 туылым, 410 өлім тіркелген. Онкологиялық аурушаңдық көрсеткіші 39,3 пайызға азайып отыр.