Қожабақыдағы қыздар футболы – ауданда алғаш­қылардың бірі болып дамып келе жатқан спорт түрі. Қыздар футболы аудандық оқушылар спартакиадасына енгеннен бас­тап №25 мектеп қыздар коман­дасы үш рет аудан жеңім­пазы және жүлдегерлер қата­рынан түскен емес. Осы жылдары аудан намысын абыройлы қорғап, облыс жеңімпаздары атанып, рес­публикалық, халықаралық тур­нирлерде өнер көрсеткен мек­теп оқушылары: Жайдар­күл Арыстанбек, Раушан Құдай­берген, Ақбота Айберген, Ақмаржан Мылтықбай, апалы-сіңлілі Бағнұр, Бекзат Дәріғұлдар, Фариза Абайқызы олардың ізбасарлары Камила Аяған, Марианна Сәлимағанбет, Альбина Сердалиева, Меруерт Алмасбекова, Фариза Кенжебекқызы, Асылзат Сәтемір сияқты ойыншылар қазіргі шақта мектептің мерейін өсіріп жүр.

Осы тақырыпты айшықтай түсетін тағы бір дәлел – осы жылдың наурыз-сәуір аралығында өткен 2006 жылы туылған және онан жас футболшы қыздар арасында өткен аудан біріншілігі. Бапкерлері Сәрсен Өмірзақ пен Қожахмет Кенжебектен тәлім алатын №25 мектеп командасы жеңілістің не екенін білместен ұпайдан шашау шығармай аудан чемпионы атанды. Құрамында: Мөлдір Қуанбай, Гүлайна Берікқызы, Салтанат Арыстанбекқызы, Аружан Бақытжан, Айымжан Сабыр, Айдина Жарқынбай, Дана Кежденбек, Әйгерім Сегізбай, Құралай Шарапат, Махаббат Елтайлар қарсыластарының бәрін жеңіп, мектептің абыройын асқақтатты. Осы турнирдің «үздік қақпашы» бағамымен Мөлдір Қуанбай танылды. Бұл – жас қыздардың алғашқы жеңісі, жалғасын тауып, биік тұғырлардан көрінетініне сенімдімін.