Ақтөбе тұрғыны букмекерлік кеңседен 19 миллион теңгені қолды етіп, артынша казинода ұтылып қалып, бар ақшасынан айырылыпты. Қазіргі уақытта қалалық сот оның ісін қарап жатыр.

Бұл туралы 31 арнаға сілтеме жасап Stan.kz хабарлайды.

Ер адам букмекерлік кеңседе жұмыс істейтін әйелінен 19 миллион теңгені ұрлап кеткен. Белгісіз себептермен, әйел кассадағы ақшаны өзі үйінде сақтап жүрген екен. Осылайша, қыруар ақшаны қолды қылған күйеуі 1 апта қарасын көрсетпепті.

Анықталғандай, ол осы уақыт бойы Қапшағайдағы казинолардың бірінде болған. Сол жерде ұтылып қалып, бар ақшасынан айырылыпты.

Қазіргі уақытта ер адам өз кінәсін мойындап отыр. Қолды қылған ақшасын да бөлшектеп қайтара бастаған. бүгінде 1,5 миллион теңгені қайтарыпты.

Ер адам соттан өзін бас бостандығынан айырмауды сұрады. Себебі ол отбасының жалғыз асыраушысы екен. Ал жүкті әйелінің ай-күні жақындап қалған.

Десе де «Аса ірі көлемдегі ұрлық» бабы бойынша, ол 5 жылдан 10 жылға дейін түрмеге қамалуы мүмкін.