Мақтаарал ауданында тағы бір ауыл судың астында қалды
Мақтаарал ауданында енді Өргебас елдімекенін су басты. Бұл туралы облыс әкімдігі шұғыл мәлімет таратты, деп хабарлайды ҚазАқпарат. «Бүгін таңғы 05.00-тен бастап 250 үйі суға батқан Фердоуси ауылы бағытынан Жаңажол ауылдық округінің Өргебас елдімекеніне қарай су келе бастады. Екі ауылдың ара қашықтығы - 3 шақырым. Таңғы 8.00-де су Өргебас елді мекенінің 194 үйін басып қалды. Ауылдың 1451 тұрғыны эвакуацияланды. Көшіру барысында зардап шеккендер жоқ» делінген хабарламада.
