Жауапкершілік жүгі жеңілдемейді
Қазалы көлік-техникалық жоғары колледжінде Қызылорда облысы білім басқарамасы «Bilim foundation» қоғамдық қорымен бірлесе ұйымдастырылған ата-аналар жиналысы өтті. Оған Қызылорда облыстық білім басқармасы «Bilim foundation» қоғамдық қорының өкілі, психолог Жания Бисенова, аудандық ішкі істер бөлімінің ювеналды полиция тобының аға инспекторы Жасұлан Куйлешев, ата-аналар комитетінің төрайымы Бағдат Айтбаева, аудандық теміржол ауруханасының психологі Жұлдыз Далиева және ата-аналар қатысты.
Күн тәртібінде жасөспірімдер арасындағы суицидтің алдын алу, қылмыстылықпен, құқық бұзушылықтың жолын кесу және жазғы демалыс кезінде балалардың өміріне қауіп төнетін жерлерден аулақ болуын қадағалау мәселелері айтылды.
Қазалы көлік-техникалық жоғары колледжі директорының оқу-тәрбие ісі жөніндегі орынбасары Серік Ералы биылғы оқу жылында 610 студент білім алып отырғанын айтты. Оның 536-сы мемлекеттік тапсырыс негізінде болса, 74-і «Нәтижелі жұмыспен қамту» бағдарламасы бойынша қабылданған. Биыл 255 студент қолына диплом алады.
Жиналғандар «Bilim foundation» қоғамдық қоры дайындаған «Егерде мен білгенімде...» атты деректі фильмді көріп, көкейге ой түйді. Ата-аналарға түсіндірме жұмыстары жүргізіліп, жазғы каникул кезінде жауапкершілікті жан-жақты сезіну бағытында кеңес берілді.
Ұлболсын ЕРБОЛҚЫЗЫ
