Жастар жүрегіндегі ізгілік
Биылғы мамырдан маусымға дейін өткен қасиетті ораза – тәрбие мектебі десек жарасады. Себебі осы айда мұсылман қауымы нәпсісін тиып, сауапты істерге ден қояды. Жаратушы алдындағы бес парыздың бірі саналғандықтан, ораза тұтқан адамның бойына небір асыл қасиеттер қонуға құмар болады. Сондай-ақ ауыз бекіткендер де, белгілі бір себеппен ораза ұстай алмағандар да ниет еткен адамға ауызашар беріп, мол сауапқа кенеледі.Ізгілікті істен қазалылықтар да тыс қалған жоқ. Жергілікті мешіттерде азаматтардың бастамасымен Рамазанда күн сайын ауызашар ұйымдастырылды. Бұл айда келешек ел тұтқасын ұстар жастар да қайырымды істен қайыр күтетіндерін көрсетті. Мәселен жуырда кенттегі Қаныш Сәтбаев пен Сәкен Сейфуллин көшесінің жас тұрғындары аудандық “Жанқожа батыр” мешітінде жамағатқа дастарқан жайды.
Ауызашарға арналған астан ондаған адам дәм татты. Мешіт қызметкерлері тарапынан уағыз бен ғибратты әңгіме айтылып, ораза ұстағандар мен оларға құрмет көрсетушілерге жазылатын мадақтар мен сауаптар жайы сөз болды. Ауызашар соңында ақсақалдар жастардың игі бастамасына ризашылығын білдіріп, батасын берді.
Ринат ӘБДІҚАЛЫҚ
