Мейірімділік – асыл қасиет

Қазалы қаласындағы Ғ.Мұратбаев атындағы №17 орта мектепте «Өзін-өзі тану: Махаббат пен шығармашылық педагогикасы» тақырыбындағы онкүндік болды. Шара аясында қазақ тілі мен әдебиеті пәнінің мұғалімі Майра Разақова «Мейірімділік – асыл қасиет» атты эссе байқауын ұйымдастырды. Оған 5-11-сынып оқушылары белсене қатысты.

«Бөбек» балалар қайырымдылық қорының Президенті Сара Назарбаеваның өмір жолы, жалпы адамзаттық рухани құндылықтарға бастайтын қайырымдылық іс-шараларымен танысу және мемлекеттің болашағы – жан-жақты дамыған жеке тұлғаны қалыптастыру, білім алушылардың шығармашылық қабілеттерін дамыту мақсатында өткен шара арқылы жас ұрпақты ата-анасына, жалпы адамға деген бауырмалдық, сүйіспеншілік, махаббат, достық секілді ізгі қасиеттерге тәрбиелеу көзделді.

Эссе байқауында бірінші орынды 11-сынып оқушысы Ақтоты Қожбан иеленді. 6-сынып оқушылары Ақбота Тағыберген, Айдана Кеңес екінші, 10-сынып оқушысы Айжан Орналиева, 6-сынып оқушысы Жібек Сухан, 5-сынып оқушысы Іңкәр Еркін үшінші орын алды.

Қуандық ДАЙРАБАЙ