Шәкен, Шилі, Шөлқұм елді мекен­де­рінен тұратын Шәкен ауылдық округі аудан орталығынан шалғай орналасқан. Соған қарамастан бүгінгі күні ауыл тынысы кеңейіп, күн өткен сайын оң өзгерістерімен қуантуда. Еңбектеген баладан еңкейген қариясына дейін еңбек пен білімге, жаңашылдыққа жаны құмар. Соның арқасында жас өрендер айтулы додалардан жүлделі оралып, шаруа адамдары кәсіптерін дөңгелетіп отыр.

Мәселен, бірер жыл бұрын пайда­лануға берілген №134 мектепте оқуға құштар 99 бала білім алады. Ауыл тұр­ғындарының басым бөлігі осы білім ошағында жұмыс істейді. Сондай-ақ, мектеп жанынан 20 тәрбиеленушіге шақталған “Балбөбек” шағын орталығы мен 40 орынды интернат орналасқан. Ал, округке қарасты Шилі елді мекеніндегі №259 мектепте қазіргі таңда 65 оқушы оқиды. Мұнда да бүлдіршіндерді мектепке бейімдеу мақсатында жұмыс істейтін “Ақтілек” орталығы ашылған.

Шәкендіктер сырқаттана қалған жағдайда аудан орталығына келіп әуре болмайды. Себебі, жергілікті жерде заманауи құрылғымен жабдықталған дәрі­герлік амбулатория халыққа қыз­мет көрсетеді. Бір мезетте 11 адамды қабыл­дай алатын амбулатория жыл басынан бері 1652 адамды дәрігерлік бақылаудан өткізіп, 287 науқасты ауруынан айықтырған. Ауыр жағдайдағы науқастарды аудан орталығына жөнелту жөнінде қиындықтар орын алмаған. Бұған жолдың уақытылы тегістелуі сеп болып отыр.

Шәкен ауылы мен аудан аралығын­дағы жолды тазалап, тегістеуге аудан­дық бюджеттен 1200,0 мың теңге қаржы бөлінген. Соның арқасында арадағы жол үш рет сүрілген. Бұдан бөлек, ауылды жарықтандыруға және күтіп ұстауға бюджеттен 3649,0 мың теңге қаржы қарастырылып, оның басым бөлігі Шилі елді мекенінің көше шамдарына жұмсалды. Ауылдың түкпір-түкпіріне электр энергиясының тартылуы кәсіпкерлік саласына да оң әсерін тигізетіні анық.

Ауыл тұрғындарының негізгі тіршілік көзі – мал шаруашылығы. Мұнда төрт түліктің барлық түрінде айтарлықтай өсім бар екендігі анықтал­ған. Өйткені мемлекеттен қолдау бар. Өткен жылы 7 кәсіпкер түрлі мемле­кеттік бағдарлама аясында несиеге қол жеткізді. Қазірдің өзінде «ҚазАгроҚаржы» орталығынан 4 шаруа қожалығы 46500,0 мың теңге не­сиеге жылқы, қой алып, мал басын асылдандыру жұмысын бастап кетті. Тағы бір шаруа қожалығы «Қызылорда өңірлік инвестициялық орталығы» арқылы 3 млн теңге несие иемденіп, мүйізді ірі қара малын өсіруде. Бұлардан бөлек, округ бойын­ша шағын және орта кәсіппен айналысатын 58 азамат болса, биыл олардың саны 8-ге артқан.

Жұмыссыздықты жою мақсатында 15 ауыл тұрғыны “Бастау бизнес” жоба­сының үшінші бағыты бойынша әлеуметтік жұмысқа тартылған. Бұған қоса, 2 адам тұрақты, 4 тұрғын маусым­дық жұмыспен қамтылды. 3 отбасы мемлекеттің атаулы көмегіне жүгінген.

Бұл туралы Шәкен ауылдық округінде өткен аудан әкімінің есепті кездесуінде айтылды. ҚР Президенті Әкімшілігінің мемлекеттік инспекторы Нұрлан Тілешев арнайы қатысқан жиында ауылдық округ әкімі Тастайбек Сермаханов пен учаскелік полиция инспекторы Рүстем Есбосынов жыл бойы жасаған жұмыстары туралы баяндады. Аудан әкімі Мұрат Ергешбаевтың есебінен соң, елді мекенге ұялы байланыс операторын әкелу мен ауызсу мәселесін шешу жолы талқыланды. Сондай-ақ, тұрғындар көкейде жүрген сауалдарын жолдап, тиісті жауабын алды.