Ит басына іркіт төгілсін
Сәні мен салтанатымен келген тауық жылы есігімізден шығып, именбей ит жылы кіргелі тұр. Қазақы жыл санау бойынша он бірінші болып күнді көрген иттің біздің жұрттың өмірінен алар орны ерекше. «Ит – адамның досы», – деп жеті қазынамыздың біріне қосамыз. Адамзат баласының қолына үйренген алғашқы жануардың бірі де осы ит екенін біреу білсе, біреу білмес.Әр он екі жыл сайын қайталанып келетін ит жылы бізге соңғы рет: 1934, 1946, 1958, 1970, 1982, 1994, 2006 жылдар аралығында келіпті.
Қазақ халқының түсінігі бойынша, мешін және тауық жылдарындағы ауыртпалық ит жылы жеңілдейді екен. Мысалы, 1933 жылы тұтас жұртымызға нәубет әкелген аштық ит жылында басылған. Сонымен қатар, 1945 жылы екінші дүниежүзілік соғыс аяқталған. Сондықтан осы ит жылын қуаныш пен шаттыққа толы, берекелі жыл десек болады. Осынау ит жылында елімізге белгілі Қаныш Сәтбаев, Тоқтар Әубәкіров, Бауыржан Момышұлы, Әзілхан Нұршайықов, Геннадий Головкин, Димаш Құдайбергенов секілді тұлғалар дүниеге келген.
Шығыс жұлдыз жорамалына сүйенсек, ит жылы туғандардың ит жылында жолы болып, өз-өздеріне деген сенімі артады. Мансабы өседі екен. Әрине, барлығы да жазмыштың еншісінде. Десе де, жақсылық ойлаған жақсылыққа жететінін айта кеткен жөн.
Еліміздегі кейбір жұлдызшылардың айтуынша, алдағы ит жылы да еліміз үшін берекесі артқан, жақсылықтарға толы жыл болмақ. Осы жылы қазақстандықтарды жаңа серпілістер, ырыс-несібе күтіп тұрған сыңайлы.
Көп жағдайда адамның ең жақын досы, қорғаушысы бола білетін ит жылында әр қазақтың шаңырағында ит басына іркіт төгілсін дейміз.
Есет ТАБЫНБАЕВ.
