Қазақстанда 2019 жылдан бастап сырттай оқу формасы тоқтайды

2019 жылдың қаңтарынан бастап Қазақстанда сырттай оқу формасы тоқтатылады. Бұл туралы білім және ғылым министрі Ерлан Сағадиев dialog.egov.kz платформасында мәлімдеді.

Министр блогында: «4 шілдеде университеттердің дербестігін арттыратын заң қабылданған. Осы заңға сай, 2019 жылдың 1 қаңтарынан бастап сырттай оқуға құжат қабылданбайды. Ал қазір сырттай оқып жатқан студенттер оқуын аяқтайды» деп жазылған.

«Бұл заңға сай білім бағдарламасын игеру үшін студенттерге нақты бір уақыт берілмейді. Жоғары оқу орындары білім үлгерімінің нәтижесіне қарай студенттердің бакалаврды уақытынан бұрын бітіруге мүмкіндік беретін ыңғайлы бағдарлама жасайды. Заңда университеттердегі оқу ақысын реттейтін норманы алып тастау қарастырылған» дейді Сағадиев. 

1 тамызда Қазақстанда білім гранттарын тағайындау комиссиясы жұмысын бастаған. Министрліктің дерегінше, биыл Қазақстан бірінші курс студенттерін қабылдау үшін 51 мыңға жуық грант бөлген. 

Дереккөз:Азаттық радиосы