Оқушыларда суды үнемдеу мәдениетін қалыптастыратын бағдарлама әзірленеді
Елімізде мектеп оқушыларының бойында суды үнемдеу мәдениетін қалыптастыруға бағытталған арнаулы оқу бағдарламасы қабылданады. Бұл туралы Парламент палаталарының бірлескен отырысынан кейін Оқу-ағарту министрі Ғани Бейсембаев айтты, деп хабарлайды inform.kz.«Суды үнемдеу сабақтарда, қосымша және мектептен тыс іс-шараларда қарастырылған. Дегенмен, осы жолғы Жолдауды ескере отырып, бұл бағытта мектептердегі тәрбие жұмыстарын күшейту қажет сияқты. Оқушыларымыздың арасында суды үнемдеу мәдениетін қалыптастыруды күшейтетін жеке бағдарлама қабылданады», - деді министр БАҚ өкілдерінің сауалына орай.
Сонымен қатар Ғани Бейсембаев оқушыларды қаржы сауаттылығына тәрбиелеу мәселесіне де тоқталды.
«Қаржы сауаттылығы – бұл тақырып 2019 жылдан мектептерге енгізілді. Дегенмен, өзге де тәжірибелерді ескере отырып, мектептерде бұл бағыттағы жұмыстарды жаңаша күшейткіміз келеді», - деді ведомство басшысы.
Айта кетейік, бүгін Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауын жария етті. Онда Президент елімізде суды үнемді пайдалану мәдениеті жоқ екендігін айтқан еді.
