Енді құтқарушылар мен полицейлер оқушыларға дәріс оқиды
Мектеп бағдарламасына қорғаныс, ішкі істер, төтенше жағдайлар министрліктерінің оқу дәрістері енгізіледі.Биыл мектептегі тәрбие бағдарламасына қорғаныс, ішкі істер, төтенше жағдайлар министрліктерінің оқу дәрістері енгізіледі. Бұл туралы Оқу-ағарту министрі Ғани Бейсембаев мәлімдеді.
Сонымен қатар, ол, биылғы оқу жылында мектептердегі тәрбие жұмыстарын күшейтуге көп көңіл бөлінетінін айтты.
"Бұл жұмысты атқаруда "Ата – ана – мектеп – бала" қағидаты, яғни ата-аналардың қолдауы аса маңызды. Сондықтан биылғы оқу жылынан бастап, барлық білім беру ұйымдарында ата-аналар академиясы, яғни, ата-аналарды педагогикалық қолдау орталығы жұмыс істейді, – деді министр.
Одан бөлек, мектептердегі тәрбие бағдарламасының аясында күштік құрылым қызметкерлері өз тәжірибесін бөліседі.
"Жалпы адамзаттық және ұлттық құндылықтар негізінде өскелең ұрпақты тәрбиелеу сапасын арттыру мақсатында – жаңа оқу жылынан бастап, 2023-2025 жылдарға арналған Біртұтас тәрбие бағдарламасы іске асырыла бастайды. Осының негізінде, биыл алғаш рет мектептегі тәрбие бағдарламасына қорғаныс, ішкі істер, төтенше жағдайлар министрліктерінің оқу дәрістері енгізіледі", – деді Ғани Бейсембаев.
Айта кетейік, Астанада "Әділетті Қазақстан: сапалы білім, адал ұрпақ, табысты ұлт" тақырыбында жыл сайынғы тамыз кеңесі өтіп жатыр.
